Uttanríkispolitikkur

Samhandil og samstarv við umheimin er grundarlag undir vøkstri og vælferð í Føroyum. Alheimsgerðin ger fjarstøðuna millum lond minni og skapar nýggjar marknaðir og samstarvsmøguleikar. Ein virkin uttanríkispolitikkur er tí lykil til at menna samfelagið í 21. øld.

Uttanríkistænastan hevur til uppgávu at røkja føroysk áhugamál úti í heimi. Uttanríkistænastan situr fyri uttanlandsmálum og millumlandaviðurskiftum, og varðar av føroyska limaskapinum í fleir- og millumtjóðafelagsskapum.

Uttanríkispolitikkur Føroya er stigvíst mentur seinastu árini, serliga eftir at Danmark í 1973 gjørdist limur í EF (nú ES) og tískil bundið av felags evropeiska fiskivinnupolitikkinum. Ein varði var, tá ið Føroyar sum eitt hitt fyrsta landið í Vesturheiminum í 1977 gjørdu fiskirættindasáttmála við Sovjetsamveldið (nú Russland). Føroyar eru ikki við í ES limaland, men hava gjørt m.a. handils- og fiskirættindisáttmála við ES. Føroyar hava í fleiri ár luttikið sjálvstøðugt sum strandarland í samráðingum og semjum við grannalond um umsiting av felags fiskastovnum á okkara leiðum í Norðuratlantshavi. Føroyar hava leingi havt eitt slag av atlimaskapi í norðurlendska samstarvinum og vit eru atlimir í IMO, FAO og UNESCO.

Føroyar virka eftir uttanríkispolitisku lógini frá 2005. Vit hava í samstarvi við danir samráðst um mørk við okkara grannar. Vit samráðast nú um rættindi til havbotn og undirgrund eisini uttanfyri 200 fjórðingar. Hoyvíkssáttmálin gjørdi Føroyar og Ísland til ein felagsmarknað.

Kalendarin hjá løgmanni